សម្ដេចនាយក រដ្ឋមន្ត្រី ហ៊ុន សែន សុំទោសប្រជាជនកម្ពុជា ដែលរូបលោកជិះម៉ូតូមិនបានពាក់មួកសុវត្ថិភាព
20-June-2016 | ដោយ មែន កំសត់
សម្ដេចនាយក រដ្ឋមន្ត្រី ហ៊ុន សែន សុំទោសប្រជាជនកម្ពុជា ដែលរូបលោកជិះម៉ូតូមិនបានពាក់មួកសុវត្ថិភាព ប្រមុខរដ្ឋាភិបាល ក៏បានទទួលយកកំហុសទាំងស្រុង ពីប្រជាពលរដ្ឋ ដែលបានទិតៀនរូបលោក តាមរយៈបណ្ដាញហ្វេសប៊ុកដែរ។
ថ្លែងក្នុងពិធីចែកសញ្ញាបត្រដល់និស្សិតសាលាភូមិន្ទរដ្ឋបាល ព្រឹកនេះនាយករដ្ឋមន្ត្រី ហ៊ុន សែន បានបកស្រាយថា ការជិះម៉ូតូជាមួយអ្នករត់ម៉ូតូឌុបម្នាក់នៅខេត្តកោះកុងកាលពី ថ្ងៃទី១៨មិថុនា នោះ គឺមានចម្ងាយប្រមាណ២៥០ម៉ែត្រទេ ប៉ុន្តែសម្ដេចទទួលស្គាល់ថាវាជាកំហុសមួយសម្រាប់លោកដែលធ្វើ ខុសច្បាប់ចរាចរណ៍ ខណៈដែលលោកបានកំណត់ច្បាប់ តម្រូវឲ្យប្រជាពលរដ្ឋជិះម៉ូតូពាក់សុវត្ថិភាពគ្រប់គ្នា ។
ប្រមុខរដ្ឋាភិបាល បានបញ្ជាក់ដូច្នេះថា៖«យ៉ាងណាក៏ដោយខ្ញុំសូមអភ័យទោសជាសាធារណៈ អំពីការខុសឆ្គងដែលខ្ញុំធ្វេសប្រហែស មិនបានពាក់មួកសុវត្ថិភាព មិនថាផ្លូវឆ្ងាយផ្លូវជិតទេ។ យើងជាអ្នកដឹកនាំប្រទេស យើងតែងណែនាំប្រជាពលរដ្ឋឲ្យពាក់មួកសុវត្ថិភាព។ ប៉ុន្ដែបែខ្លួនយើងមិនពាក់មួកសុវត្ថិភាព។ ដូចនេះសូមមេត្តាកុំយកគំរូអាក្រក់នេះតាមខ្ញុំ [ពុតគ្រូកុំត្រាប់ច្បាប់គ្រូឲ្យយក]»។
នាយករដ្ឋមន្ត្រី ហ៊ុន សែន យកព្រមទទួលកំហុសនេះ ដោយលោកបញ្ជាក់ថា លោកសុខចិត្តបង់ប្រាក់ផាកពិន័យ បើសិនជាសមត្ថកិច្ចចង់ផាកពិន័យ។ សម្ដេច ហ៊ុន សែន អំពាវនាវប្រជាពលរដ្ឋជិះម៉ូតូ គោរពច្បាប់ចរាចរណ៍ និងពាក់មួកសុវត្ថិភាពទាំងអស់គ្នា ដោយប្រជាពលរដ្ឋ មិនត្រូវយកគំរូអាក្រក់តាមរូបលោកឡើយ។
កាលពីថ្ងៃទី ១៨ មិថុនា នាយករដ្ឋមន្ត្រី ហ៊ុន សែន បានសួរសុខទុក្ខអ្នករត់ម៉ូតូឌុបម្នាក់ ហើយបានធ្វើជា«តៃកុង»បើកម៉ូតូដោយផ្ទាល់ដឹកម្ចាស់ម៉ូតូឌុបនោះវិញ ដោយមិនបានពាក់មួកសុវត្ថិភាព នៅពេលដែលលោកបានចុះសួរសុខទុក្ខប្រជាពលរដ្ឋនៅតាមដងផ្លូវខេត្តកោះកុង។ អ្នកប្រើប្រាស់បណ្ដាញសង្គមហ្វេសប៊ុក បាននាំគ្នាទិតៀនរិះគន់យ៉ាងខ្លាំង ចំពោះសម្ដេច ហ៊ុន សែន ដែលបើកបរម៉ូតូមិនបានពាក់មួកសុវត្ថិភាព ក្នុងនាមជាប្រមុខរដ្ឋាភិបាល ដែលជាអ្នកកំណត់ច្បាប់៕
ចំនួនអ្នកទស្សនា
- ថ្ងៃនេះ811
- ម្សិលមិញ4911
- សប្តាហ៍នេះ18381
- ខែនេះ811
- ឆ្នាំនេះ244051
- សរុប20686507